فیصل آباد / کراچی ( سید وزیر علی قادری) نورپور لائنز نے بحریہ ٹاؤن چیمپئنز ون ڈے کپ کے پہلے ایلیمنیٹر میں الائیڈ بینک اسٹالیئنز کو 12 رنز سے شکست دے دی۔ آج دوسرے ایلیمنیٹر میں نورپور لائنز کا مقابلہ یو ایم ٹی مارخورز سے ہوگا جسے کوالیفائر میں لیک سٹی پینتھرز نے 7 وکٹوں سے شکست دی تھی۔ گزشتہ روز اقبال اسٹیڈیم میں کھیلے گئے پہلے ایلیمنیٹر میں شاہین شاہ آفریدی کی جگہ لائنز کی کپتانی کرنے والے امام الحق نے ٹاس جیت کر پہلے بیٹنگ کا فیصلہ کیا۔ ان کی ٹیم 50 اوورز میں 9 وکٹوں کے نقصان پر263 رنز بنانے میں کامیاب رہی۔ اسٹالیئنز جواب میں 49.3 اوورز میں 251 رنز بناکر آؤٹ ہوگئی۔ نوجوان فاسٹ بولر عبید شاہ کی 3 وکٹوں کی عمدہ کارکردگی نے لائنز کو ابتدا ہی میں مشکل سے دوچار کردیا۔ روحیل نذیر ( 4 ) عمیر بن یوسف ( 4 ) اور امام الحق ( 23 ) آؤٹ ہوئے تو مجموعی اسکور صرف 43 رنز تھا۔ محمد طحٰہ اور شرون سراج نے اسکور میں 77 رنز کا اضافہ کیا لیکن اس شراکت کے بعد لائنز ایک بار پھر مشکلات سے دوچار ہوگئی۔
