کراچی ( اسٹاف رپورٹر)گورنر سندھ کامران خان ٹیسوری نے کہا ہے کہ چین کی جدید ترین ٹیکنالوجی سے استفادہ کر کے تیز ترین ترقی یقینی ہے اس ضمن میں چین کا تعاون قابل تحسین ہے۔ چین کے اشتراک سے جاری تمام منصوبوں کی تکمیل سے عصر حاضر کی جدت سے ہم آہنگ ترقی خطہ کی خوشحالی کے لیے اہم ثابت ہوگی۔ ان خیالات کا اظہار انہوں نے عوامی جمہوریہ چین کے 75 ویں قومی دن کی تقریب میں شرکت کے موقع پر کیا۔ تقریب میں گورنر سندھ نے عوامی جمہوریہ چین کے قومی دن کے موقع پر کیک بھی کاٹا۔ گورنر سندھ نے مزید کہا کہ اس اہم موقع پر عوامی جمہوریہ چین کے عوام کو مبارک باد دیتا ہوں۔ انہوں نے کہا کہ مل کر جشن منانا دو طرفہ پائیدار تعلقات کا واضح ثبوت ہے۔ انہوں نے کہا کہ اس میں کوئی دو رائے نہیں ہے کہ لازوال محبت اور باہمی احترام سے جڑی پاک چین دوستی ہمالیہ سے بلند اور سمندر سے بھی گہری ہے۔ میں اس اہم تقریب کا فائدہ اٹھاتے ہوئے چین و دیگر ممالک کے سرمایہ کاروں کو صوبہ میں سرمایہ کاری کی دعوت دیتا ہوں۔ صوبہ کا بہترین ماحول، منافع بخش شعبے سرمایہ کاری کے لیے آئیڈیل ہیں۔
