کراچی(اسپورٹس رپورٹر )پاکستان میں چیمپئینز ٹرافی 2025 کی میزبانی کو لیکر ایک مرتبہ پھر بھارت نے منفی پروپیگنڈا پھیلانا شروع کردیا۔چیمپئینز ٹرافی کے سلسلے میں پاکستان کے دورے پر آئے انٹرنیشنل کرکٹ کونسل ( آئی سی سی) کے وفد پاکستان میں سیکیورٹی سمیت اسیٹیڈیمز کی اپ گریڈیشن پر اطمینان کا اظہار کیا تھا۔تاہم بھارتی میڈیا نے جھوٹی خبریں پھیلانا شروع کردی ہیں کہ آئی سی سی وفد نے پاکستان میں ایونٹ کی میزبانی کو لے کر تشویش ظاہر کی ہے۔ پاکستان دورے پر آئے وفد میں آئی سی سی کی سینئر مینجر ایونٹس سارہ ایڈگر، ایونٹ مینجر و چیمپئنز ٹرافی ایونٹ لیڈ عون محمد زیدی، جنرل مینجر کرکٹ وسیم خان، سکیورٹی مینجر ڈیوڈ مسکر اور براڈ کاسٹ کنسلٹنٹ منصور منج شامل تھے۔آئی سی سی کے وفد نے چیئرمین پی سی بی محسن نقوی سے بھی ملاقات کی، جس میں انہیں اسٹیڈیمز کی اپ گریڈیشن، سیکورٹی پلانز سمیت شائقین کرکٹ کو فراہم کی جانے والی سہولیات سے بھی آگاہ کیا گیا۔ پی سی بی کے ترجمان کے مطابق گزشتہ روز وفد نے لاہور قذافی کرکٹ اسٹیڈیم کا دورہ کیا اور اطمئنعان کا اظہار کیا۔ پاکستان میزبانی کے لئے مکمل طور پر یکسو ہے اور تیار ہے۔ دوسری جانب بھارت نے آئی سی سی چیمپئینز ٹرافی 2025 کیلئے تاحال اپنی ٹیم بھیجنے سے متعلق کوئی اعلان نہیں کیا ہے جس کی وجہ سے ٹورنامنٹ کا شیڈول تاخیر کا شکار ہے۔ واضح رہے کہ چیمپئینز ٹرافی آئندہ سال فروری اور مارچ میں شیڈول ہے جس میں ٹاپ 8 ٹیمیں حصہ لیں گی۔
