قومی فزیکل ڈس ایبلٹی ٹی ٹو ئنٹی : راولپنڈی پی ڈی کامیاب

کراچی(اسپورٹس رپورٹر) راولپنڈی فزیکل ڈس ایبلیٹی ٹیم نے محمد ارسلان کی ناقابل شکست 168 رنز کی ریکارڈ طوفانی اننگ کی بدولت شاہد آفریدی فاؤنڈیشن قومی فزیکل ڈس ایبلٹی ٹی20 کرکٹ چیمپئن شپ گریڈ 2 کے چوتھے میچ میں شاندار کامیابی حاصل کرلی۔شاہد آفریدی فاؤنڈیشن اورپاکستان فزیکل ڈس ایبلٹی کرکٹ ایسوسی ایشن کے اشتراک سے آرمی کرکٹ گرائونڈ پنڈی میں گریڈ 2 کے مرحلہ میں آزاد کشمیر پی ڈی ٹیم کو 155 رنز کے بھاری مارجن سے شکست کا سامنا کرنا پڑ۔ کھیلے گئے میچ میں راولپنڈی  پی ڈی کی ٹیم پہلے کھیلتے ہوئے مقررہ 20 اوورز میں صرف 3 وکٹوں کے نقصان پر260 کا ہمالیہ کھڑا کردیا۔ محمد ارسلان نے انتہاء جارحانہ سنچری 168 رنز 70 گیندوں پر 28 خوبصورت چوکوں اور 5چھکوں کی مدد سے بنائے جبکہ حضیفہ خان نے 24 گیندوں پر 40 رنز میں 7 چوکے اور ایک چھکا  لگایا۔ آزاد کشمیر پی ڈی کی جانب سے شوکت علی 36  رنز دے کر 2 وکٹیں حاصل کیں جبکہ محمد کامران  نے ایک وکٹ سمیٹی۔جواب میں آزاد کشمیر کی ٹیم 7 وکٹوں پر 105 رنز بنا سکی۔ جاوید حسین  نے 46 گیندوں پر 5 چوکوں کی مدد سے 38 رنز ناٹ آئوٹ اسکور کیے۔ محمد امتیاز نے 22 رنز ناٹ آئوٹ میں 4 چوکے لگائے۔
فاتح ٹیم کی جانب سے محمد عاصم نے تباہ کن بولنگ کرتے ہوئے24 رنز کے عوض3 کھلاڑیوں کو شکار کیا، بلال عظیم اور قیوم خان  نے2,2 وکٹیں حاصل کیں۔ مہمان خصوصی صدر گرین لینڈ کرکٹ کلب غلام مصطفی اور کراچی کنگز کے کھلاڑی  ذیشان ملک نے فاتح ٹیم راولپنڈی پی ڈی کے محمد ارسلان کو ناقال شکست ریکارڈ جارحانہ 168 رنز بنانے پر پلیئر آف دی میچ قرار دیا۔ اس موقع پر ریجنل ہیڈ راولپنڈی سید رافیع ہاشمی بھی موجود تھے۔