اسلام آباد (مانیٹرنگ ڈیسک) قومی اسمبلی کی پبلک اکاؤنٹس کمیٹی کے چیئرمین کے لیے 2 خطوط کے باوجود اپوزیشن سے نام نہ ملنے پر حکمران جماعت نے چیئرمین پی اے سی کے لیے عبوری چیئرمین مقرر کرنے کا فیصلہ کیا ہے۔ تفصیلات کے مطابق اس حوالے سے چیف وہپ ڈاکٹر طارق فضل چودھری کا پبلک اکاونٹس کمیٹی سے متعلق اہم بیان سامنے آیا ہے جس میں انہوں نے بتایا ہے کہ حکمران جماعت نے چیئرمین پی اے سی کے لیے عبوری چیئرمین مقرر کرنے کا فیصلہ کیا ہے۔ ڈاکٹر طارق فضل چودھری نے کہا ہے کہ بہترین عوامی مفاد میں یہ عہدہ زیادہ دیر تک خالی نہیں رکھا جاسکتا، پبلک اکاؤنٹس کمیٹی کے چیئرمین کے لیے الیکشن اگلے ایک یا دو دن میں ہوجائے گا، اپوزیشن کو چیئرمین پی اے سی کے لیے 2 خطوط لکھے ہیں۔ ڈاکٹر طارق فضل چودھری نے کہا کہ خطوط میں کہا گیا کہ اپوزیشن 4 ممبران پر مشتمل پینل بھجوائے، اپوزیشن نے ابھی تک ان دونوں خطوط کا کوئی مثبت جواب نہیں دیا ہے، پبلک اکاونٹس کمیٹی کا آئندہ ایک سے دو دن میں الیکشن کروانے کا فیصلہ کیا ہے، کسی حکومتی ممبر کو چیئرمیں پی اے سی منتخب کیا جائے گا۔ ان کا کہنا تھا کہ حکومتی چیئرمین ایک عارضی بندوبست کے لیے منتخب کیا جائے گا، پبلک اکاونٹس کمیٹی کا چیئرمین شپ اپوزیشن کی امانت ہے، جب بھی اپوزیشن 4 ناموں پر مشتمل پینل بھجوائے گی منتخب شدہ چیئرمین مستعفی ہوجائے گا، نئے الیکشن کے ذریعے اپوزیشن کا چیئرمین منتخب کروایا جائے گا، پبلک اکاونٹس کمیٹی کی اہمیت کی وجہ سے ا س کے اجلاس کو اور الیکشن کو غیر معینہ مدت تک ملتوی نہیں کیا جاسکتا۔
