اسلام آباد (مانیٹرنگ ڈیسک) وزیر اطلاعات عطا اللہ تارڑ نے کہا کہ پی ٹی آئی نے آئینی ترمیم کے مسودے پر سیاست کی کسی کو این آر او نہیں ملے گا۔ اسلام آباد میں پریس کانفرنس کرتے ہوئے انہوں نے کہا کہ آئینی ترامیم کے حوالے سے وسیع تر مشاورت کا سلسلہ جاری ہے، تمام سیاسی جماعتوں نے نہ صرف اس پر گفت و شنید کی بلکہ کوشش کی کہ اس پر اتفاق رائے پیدا ہو، پارلیمان میں تمام جماعتوں نے آئینی ترامیم پر سیر حاصل گفتگو کی، وزیر قانون کا آئینی ترامیم کے مسودے کے حوالے سے کردار لائق تحسین ہے۔ انہوں نے کہا کہ دنیا کے مختلف ممالک میں عدالت عظمیٰ الگ اور آئینی عدالتیں الگ ہوتی ہیں، آئینی معاملات آئینی عدالتوں میں جاتے ہیں تاکہ عام شہریوں کو انصاف کی راہ میں رکاوٹ نہ آئے اور ان کے کیسز جلد اپنے منطقی انجام تک پہنچ سکیں، پاکستان میں 9 مئی کے واقعات کے فیصلے اب تک نہیں ہوسکے، امریکا میں کیپیٹل ہل کے کیسز چند ماہ کے اندر اپنے انجام کو پہنچے۔ انہوں نے کہا کہ مولانا فضل الرحمن سے بھی آئینی ترامیم پر مشاورت جاری ہے، آئینی ترمیم پر اتفاق رائے پیدا کیا جا رہا ہے، آئینی ترمیم کے مسودہ میں انصاف کے نظام کو آسان بنانے کے لیے شقیں موجود ہیں، آئینی ترمیم میں مزید مشاورت کر کے اس معاملے کو آگے بڑھنا چاہیے، پی ٹی آئی نے آئینی ترمیم کے مسودے پر سیاست کی، کسی کو این آر او نہیں ملے گا۔
