اسلام آباد: صدر مملکت آصف علی زرداری نے کہا ہے کہ اللہ تعالیٰ نے رسول اللہﷺ کی زندگی کو ہمارے لیے بہترین نمونہ قرار دیا ہے۔
عید میلادالنبیﷺ کے موقع پر اپنے پیغام میں صدر زرداری نے تاکید کی کہ ہمیں دنیا بھر میں امن، بھائی چارہ، اور محبت کو فروغ دینا چاہیے، کیونکہ نبی کریمﷺ کی زندگی ہر شعبے کے افراد کے لیے رہنمائی فراہم کرتی ہے۔
صدر زرداری نے مزید کہا کہ ہمیں موجودہ چیلنجز کا سامنا کرتے ہوئے نبیﷺ کی زندگی کو اپنے لیے نمونہ بنانا چاہیے، کیونکہ آپﷺ کی زندگی ہمارے لیے ہدایت کا بہترین ماخذ ہے۔
وزیراعظم محمد شہباز شریف نے عید میلادالنبیﷺ کے موقع پر امت مسلمہ کو مبارکباد دی۔ اپنے پیغام میں وزیراعظم نے کہا کہ نبی کریمﷺ نے اتحاد، محبت، اور بھائی چارے کی اہمیت پر زور دیا۔ آج امت مسلمہ کو کئی مسائل اور چیلنجز کا سامنا ہے، اور ان مسائل کا حل نبیﷺ کی تعلیمات میں مضمر ہے۔
وزیراعظم نے مزید کہا کہ ہمیں آج کے مشکل دور میں نبیﷺ کی سیرت پر عمل پیرا ہونے کی ضرورت ہے اور ان لوگوں کی مدد کرنی چاہیے جو بھوک، افلاس اور دیگر مشکلات کا سامنا کر رہے ہیں۔
