کراچی (اسٹا ف رپورٹر) پاکستان انٹرنیشنل ائر لائنز (پی آئی اے) نے پاکستان ٹریول مارٹ کے ساتھ ایک اسٹریٹجک شراکت داری کی ہے، یہ شراکت داری پاکستان کی سیاحت کی صنعت کو فروغ دینے کی جانب ایک اہم قدم ہے، دونوں تنظیموں کا مقصد بین الاقوامی سیاحوں کی ایک بڑی تعداد کو راغب کرنا اور ملک کے بھرپور ثقافتی ورثے، دلکش مناظر اور روائتی گرمجوشی سے مہمان نوازی کرنا ہے۔ پاکستان ٹریول مارٹ کے زیر اہتمام پاکستان کا سب سے بڑا ٹریول اینڈ ہاسپیٹلٹی ایکسپو منعقد کیا جارہا ہے۔ دونوں اداروں کے درمیان اس تعاون کا بنیادی مقصد پاکستان کو ایک اعلی سیاحتی مقام کے طور پر فروغ دینا اور آئندہ پاکستان ٹریول مارٹ ایونٹ میں شرکت کرنے والے وفود کیلیے بغیر کسی رکاوٹ کے سفر کے تجربات کی سہولت فراہم کرنا ہے۔ اسلام آباد میں منعقدہ ایک تقریب میں پی آئی اے کے سی ای او ائر وائس مارشل عامر حیات اور پی ٹی ایم کے سی ای او محمد علی ہمدانی کے درمیان مفاہمت کی یادداشت پر دستخط ہوئے۔
