خیرپور (جسارت نیوز) شاہ عبداللطیف یونیورسٹی نے اہم سنگِ میل عبور کر لیا، وائس چانسلر میریٹوریس پروفیسر ڈاکٹر محمد یوسف خشِک کی قیادت میں فائنانس آٹومیشن ماڈیول کا افتتاح کیا گیا۔ ڈاکٹر خشک نے فائنانس آٹومیشن ماڈیول کا افتتاح کرتے ہوئے کہا کہ یہ جدید نظام یونیورسٹی میں مالیاتی نگرانی کے عمل کو ایک نئے انداز میں منظم کرے گا، جس سے حقیقی وقت میں ڈیٹا کا تجزیہ اور انتظام ممکن ہو سکے گا۔ افتتاحی تقریب کے دوران وائس چانسلر ڈاکٹر خشک نے زور دیا کہ یہ جدید ماڈیول مالیاتی آپریشنز میں درستگی اور شفافیت میں اضافہ کرے گا، یہ صرف ایک عملی اوزار نہیں ہے، یہ اہم معلومات فراہم کرے گا جو دانشمندانہ فیصلے کرنے میں معاون ہو گی اور یونیورسٹی کے مالی مستقبل کو مضبوط بنائے گا، یہ کامیابی یونیورسٹی کی جدید ٹیکنالوجیز کو اپنانے کے عزم کا ثبوت ہے، جس کا مقصد انتظامی بوجھ کم کرنا اور مالیاتی کارکردگی کو بہتر بنانا ہے۔ ڈاکٹر خشک نے یونیورسٹی کے ڈائریکٹر فائنانس جناب شجاعت علی کی مالیاتی مہارت اور ان کی اسٹریٹجک بصیرت کی تعریف کی اور یونیورسٹی کے مالیاتی نظام کو جدید بنانے میں ان کے اہم کردار کو سراہا۔ تقریب میں خطاب کرتے ہوئے ڈائریکٹر فائنانس شجاعت علی نے وائس چانسلر ڈاکٹر خشک کی متحرک قیادت اور رہنمائی کو فائنانس آٹومیشن ماڈیول کی کامیابی کا سہرا دیا۔
