کراچی (اسٹاف رپورٹر)امریکی قونصل جنرل اسکاٹ اربام نے کراچی میں مزار قائد پر حاضری دی اور بانی پاکستان محمد علی جناحؒ کو خراج تحسین پیش کیا۔ اس موقع پر قونصل جنرل اربام نے قائد اعظم کے مزار پر پھول رکھے اور مہمانوں کی کتاب پر امریکی عوام کیجانب سے تاثرات درج کیے۔اس موقع پر قونصل جنرل اربام نے کہا کہ “مزار قائد پر حاضری دے کر بانی پاکستان کو خراج تحسین پیش کرنا باعث فخر ہے، اس دورے سے قائد اعظم محمد علی جناحؒ کے عظیم ورثے کی یاد تازہ ہوگئی ہے۔ آج کا یہ دورہ پاکستان کے ساتھ پائیدار و مضبوط تعلقات استوار کرنے کے امریکی عزم کی توسیع ہے۔ اس کے علاوہ یہ دورہ بانی پاکستان محمد علی جناح کے متحد اور جمہوری پاکستان کے تصور کی یاد تازہ کرتا ہے، جس میں انہوں نے مساوات، سماجی انصاف اور معاشی مواقع کو غالب اہمیت دی ہے۔ دونوں ممالک بانی پاکستان کے ان خیالات کو عزیز رکھتے ہوئے مختلف شعبہ جات میں تعاون کے ذریعے اس کی تکمیل کے لیے کوشاں ہیں۔
