بیجنگ (انٹرنیشنل ڈیسک) چین میں اسکول کے دروازے پر کھڑے بچوں کو بس نے کچل دیا۔ خبر رساں ادارے کے مطابق افسوسناک واقعہ چین کے صوبے شینڈونگ کے شہر تائی آن میں صبح اْس وقت پیش آیا جب بچے قطار بناکر مرکزی دروازے سے اسکول میں داخل ہو رہے تھے۔ اس دوران تیز رفتار اسکول بس چڑھ دوڑی ،جس کے نیچے آکر 6والدین اور 5بچے ہلاک ہوگئے۔ واقعے میں 13افراد زخمی بھی ہوئے،جن میں ایک کی حالت تشویش ناک ہے۔ پولیس کا کہنا ہے کہ بس ڈرائیور کو حراست میں لے لیا گیا ہے ،جب کہ واقعے کی تحقیقات شروع کردی گئی ہے۔
