اسلام آباد (نمائندہ جسارت) وزیراعظم شہباز شریف نے کہا ہے کہ مہنگائی کا بوجھ آہستہ آہستہ کم ہورہا ہے ، دن رات ایک کر کے حالات بدل دیے ہیں۔وفاقی کابینہ کے اجلاس سے خطاب کرتے ہوئے ان کا کہنا تھا کہ ہمارے ملک میں وسائل کی کمی نہیں، روزگار کے مواقع پیدا کرنا ہماری اولین ترجیح ہے، سب مل کر محنت کر رہے ہیں، اگست میں مہنگائی کی شرح 9.6 فیصد پر آگئی، وزیر خزانہ اور ان کی ٹیم کو ستائش پیش کرتا ہوں۔انہوں نے کہا کہ پاکستان کے کروڑوں لوگ بہت قابل ہیں، یہاں کسی چیز کی کمی نہیں، معدنیات، قدرتی وسائل ہیں، حالات میں بتدریج بہتری آرہی ہے، ملک کو تیزی سے آگے لے کر جانا ہے، آئی ایم ایف پروگرام سے متعلق لوازمات کے لیے اقدامات اٹھائے جارہے ہیں۔وزیراعظم کے بقول یہ سفر کٹھن اور مشکل ضرور ہے لیکن ناممکن نہیں، پورا یقین ہے اپنی منزل تک پہنچیں گے، اپنے اہداف پر فوکس رہنا ہوگا، عملی بصیرت پر ہماری کمٹمنٹ باتوں، پیپر اور سمری سے زیادہ ہونی چاہیے، روزگار کے مواقع پیدا کرنا ہماری اولین ترجیح ہے، ہمیں اسمگلنگ کا بھی خاتمہ کرنا ہے۔ قبل ازیں وفاقی کابینہ کے اجلاس میں ملک کی سیاسی و معاشی صورتحال پر تبادلہ خیال کیا گیا ۔وزیر اعظم اجلاس میں ملک کی موجودہ امن و امان کی صورتحال کا بھی جائزہ لیا گیا ہے۔شہباز شریف کی زیر صدارت ہونے والے وفاقی کابینہ کے اجلاس میں 10 نکاتی ایجنڈے پر غور کیا گیا۔
