کراچی: گلشن معمار پولیس نے اندھے قتل کا معمہ حل کرتے ہوئے ملزم کو گرفتار کرلیا ہے۔
رپورٹ کے مطابق 29 اگست کو گلشن معمار تھانے کی حدود میں واقع ناردرن بائی پاس کے قریب افغان بستی سے 21 سالہ نوجوان دولت خان کی لاش ملی تھی، جسے نامعلوم ملزمان نے فائرنگ کرکے قتل کیا تھا۔
پولیس نے قتل کا مقدمہ درج کرکے تفتیش شروع کی۔ مقدمہ نمبر 332/2024 بجرم دفعہ 302/34 کے تحت درج کیا گیا تھا۔ پولیس نے تفتیشی اور ٹیکنیکل بنیادوں پر کارروائی کرتے ہوئے قتل میں ملوث ملزم محمد شریف عرف موٹا کو گرفتار کرلیا۔
ایس ایس پی ویسٹ حفیظ الرحمٰن بگٹی کے مطابق گرفتار ملزم محمد شریف اور مقتول دولت خان دوست اور ایک ہی محلے کے رہائشی تھے۔ ملزم نے ذاتی رنجش کی بناء پر فائرنگ کرکے قتل کرنے کا اعتراف کیا ہے۔
پولیس نے ملزم کو مزید قانونی کارروائی کے لیے تفتیشی حکام کے حوالے کردیا ہے۔ اس کارروائی نے نہ صرف قتل کا معمہ حل کیا بلکہ علاقے میں امن و امان کی صورتحال کو بھی بہتر بنایا ہے۔
