کراچی (صباح نیوز)قطر کے شہر دوحہ سے فلپائن جانے والی پرواز نے کراچی میں ہنگامی لینڈنگ کی۔سول ایوی ایشن کے مطابق پرواز کیو آر 926 قطر سے فلپائن جا رہی تھی کہ پاکستان کی فضائی حدود میں ڈریم لائنر طیارے کا ایک انجن بند ہو گیا۔ترجمان سول ایوی ایشن کے مطابق 39 ہزار فٹ کی بلندی پر قطر ائیر ویز کے طیارے میں خرابی پیدا ہوئی، پائلٹ نے مے ڈے کی کال دی اور کراچی میں ہنگامی لینڈنگ کی اجازت مانگی۔اجازت ملنے کے بعد طیارہ کراچی کے جناح انٹرنیشنل ائیرپورٹ پر بحفاظت لینڈ کر گیا، طیارے میں سوار 187 مسافروں کو لائونج منتقل کر دیا گیا۔مسافر طیارہ فلپائن کے شہر اینجلس سٹی جا رہا تھا ۔ ایوی ایشن کے مطابق طیارے کے مسافر روانگی کے منتظر ہیں۔
