سکھر (نمائندہ جسارت) گنجان آباد علاقوں میں پانی کی قلت پر قابو نہ پایا جاسکا، پریشان شہری سڑکوں پر نکل آئے۔ اس سلسلے میں پریس کلب پر احتجاج کیا اور شدید نعرے بازی کی۔ یوسی درگاہ قاضی بابا کی برکاتی مسجد کے علاقے ولی محمد گوانی، لیاقت علی، محمد شریف، ظہور احمد اور دیگر نے پریس کلب پر احتجاج کرتے ہوئے کہا کہ ہمارے علاقے میں گزشتہ کئی ماہ سے پانی سپلائی نہیں کیا جا رہا، مہینوں سے پانی کی فراہمی معطل ہے، کئی بار یوسی چیئرمین اور میونسپل انتظامیہ کو شکایت کی لیکن بدقسمتی سے ہماری شکایات کا ازالہ نہیں کیا جا رہا۔ انہوں نے میئر ارسلان اسلام شیخ سے اپیل کی کہ نوٹس لے کر پانی کی قلت کے خاتمے کے لیے ہنگامی بنیادوں پر موثر اقدامات کریں۔
