خیرپور (جسارت نیوز) یوم شہدائے پاکستان 6 ستمبر کے سلسلے میں گورنمنٹ ناز پائلٹ ہائی سکول خیرپور کے لان میں سماجی رہنما کامران علی آریجو، شفقت حسین مہیسر اور سلیم احمد راجپر کی جانب سے یوم شہدا کرکٹ ٹورنامنٹ کا انعقاد کیا گیا۔ افتتاحی تقریب میں چیئرمین ضلع کونسل نادر شوکت راجپر، ڈپٹی کمشنر سید احمد فواد شاہ اور چیف آفیسر ضلع کونسل یوسف شیخ نے بطور مہمان خصوصی شرکت کی اور باؤلنگ اور بیٹنگ کر کے ٹورنامنٹ کا افتتاح کیا۔ افتتاحی تقریب میں ڈپٹی ڈائریکٹر انفارمیشن سید ساجد حسین شاہ، وسیم گل سولنگی، عمران دہوٹ انفارمیشن آفیسر امان اللہ چنا سمیت شہریوں اور کرکٹرز کی بڑی تعداد نے شرکت کی۔ اس موقع پر مون لائٹ کرکٹ کلب اور الشہباز کرکٹ کلب کے درمیان ٹورنامنٹ کے پہلے افتتاحی میچ میں شمعیں روشن کی گئیں اور ملکی سالمیت کی خاطر جانوں کا نذرانہ پیش کرنے پر انہیں خراج تحسین پیش کیا گیاجس میں مون لائٹ کلب کی جانب سے 10 اوورز کے میچ میں 93 رنز بنائے۔ اس موقع پر ٹورنامنٹ کے آرگنائزر سماجی رہنما کامران علی آریجو، شفقت حسین مہیسر اور سلیم احمد راجپر نے بتایا کہ اس ٹورنامنٹ میں 12 ٹیمیں حصہ لے رہی ہیں اور یوم شہداء کے سلسلے میں یہ ٹورنامنٹ 6 ستمبر تک جاری رہے گا جس میں ضلع کونسل اور ضلعی انتظامیہ کا بھرپور تعاون حاصل ہے۔
