راولپنڈی(سید وزیر علی قادری) پاکستان اور بنگلا دیش کی ٹیموں کے درمیان پہلے ٹیسٹ کے چوتھے روزپاکستان نے کھیل کے اختتام پر اپنی دوسری اننگز میں ایک وکٹ کے نقصان پر23 رنز بنا لیے۔ راولپنڈی میں کھیلے جارہے ٹیسٹ میچ کے چوتھے روز کا کھیل ختم ہونے تک پاکستان کو بنگلا دیش کی پہلی اننگز کا سکور برابر کرنے کیلیے مزید 94رنز درکار ہیں۔ جبکہ عبداللہ شفیق 12رنز جبکہ کپتان شان مسعود 09رنز کیساتھ کریز پر موجود ہیں۔دوسری اننگز کے آغاز پر اوپنر صائم ایوپ صرف ایک رنز بنا کر آوٹ ہو گئے، واحد وکٹ بنگلا دیشی بولر شرف السلام نے حاصل کی۔اس سے پہلے چائے کے وقفے کے بعد بنگلا دیش کی ٹیم اپنی پہلی اننگز میں 565 رنز بنا کر آؤٹ ہو گئی۔ مہمان ٹٰم نے پہلی اننگز میں پاکستان پر 117 رنز کی برتری حاصل کر لی۔ اس سے پہلے بنگلا دیش کا پاکستان کے خلاف سب سے زیادہ سکور555 رنز تھا، مشفیق الرحیم نے 191 رنز کی شاندار اننگز کھیلی، اور گیارہویں ٹیسٹ سنچری بنائی۔ مشفیق الرحیم 191 رنز، شادمان اسلام 93 رنز، مہدی حسن میراز 77 رنز،لٹن داس 56 رنز،مومن الحق 50 رنز،شرف السلام 22 رنز،کپتان نجم الحسن شنتو 16 رنز ، شکیب الحسن 15 رنز، ذاکر حسن 12 رنز اور حسن محمود بغیر کوئی رنز بنائے آؤٹ ہوئے جبکہ ناہید رانا ایک رنز بنا کر ناٹ آؤٹ رہے۔پاکستان کی جانب سے نسیم شاہ نے تین، شاہین شاہ افریدی، خرم شہزاد اور محمد علی نے دو، دو جبکہ صائم ایوب نے ایک وکٹ حاصل کی۔بنگلا دیش کے کھلاڑیوں نے تیسری وکٹ کی شراکت میں 94 رنز، چھٹی وکٹ کی شراکت میں 114 رنز اور ساتویں وکٹ کی شراکت میں 196 رنز بنائے۔ واضح رہے کہ بنگلا دیش نے چوتھے روز 316 رنز 5 وکٹوں کے نقصان پر اپنی پہلی اننگ کا دوبارہ آغاز کیاتھا، اس سے قبل پاکستان نے 448 رنز 6 کھلاڑی اوٹ پر اپنی پہلی اننگ ڈیکلیئر کر دی تھی۔
