کراچی : شہر قائد میں 25 اور 26 اگست کو موسلادھار بارش کے امکانات ہیں، بلدیہ عظمیٰ کے تمام اسٹاف کی چھٹی منسوخ کرتے ہوئے رین ایمرجنسی نافذ کردی گئی۔
محکمہ موسمیات کی پیشگوئی کے بعد ایمرجنسی نافذکی گئی، کراچی میں 25 اور 26 اگست کو موسلادھار بارش کے امکانات ہیں۔ بلدیہ عظمیٰ کراچی کی میونسپل سروسز کو ہائی الرٹ رہنے کی ہدایت کردی ہے۔ میئرکراچی کا کہنا تھاکہ شہر میں ممکنہ بارشوں سے نمٹنے کیلئے بلدیہ عظمیٰ کے تمام اسٹاف کی چھٹی منسوخ کردی ہے۔
محکمہ موسمیات کا بتانا ہےکہ 25 سے 29 اگست کے دوران کراچی، حیدرآباد، ٹھٹھہ، بدین اور تھرپارکر میں تیز ہواؤں کے جھکڑ چلنے اور گرج چمک کے ساتھ بارش کا امکان ہے۔جبکہ 26 سے 30 اگست کے دوران خضدار، قلات، لسبیلہ، نصیر آباد اور 25 اگست کی رات سے 28 اگست کے دوران اسلام آباد، راولپنڈی، مری اور گلیات میں بھی وقفے وقفے سے بارش کا امکان ہے۔
