کراچی (اسٹاف رپورٹر) ملک میں کام کرنے والی ٹیلی کام آپریٹرز ایسوسی ایشن نے انٹرنیٹ کی سست رفتاری کے مسئلے کے حل کیلیے وزیراعظم شہباز شریف سے خط لکھ کر مدد مانگ لی۔ پاکستان میں انٹرنیٹ کی رفتار سست ہونے سے انٹرنیٹ ٹریفک میں کمی، ٹیلی کام کمپنیوں کے ساتھ حکومت کو بھی ریونیو کے نقصان کا سامنا ہے، آئی ٹی کے ساتھ تجارت، بینکنگ، ہیلتھ، ایجوکیشن، مالیاتی شعبہ اور پبلک سیکٹر کے ادارے بھی متاثر ہو رہے ہیں۔ ایسوسی ایشن کی جانب سے وزیر اعظم کو ارسال خط میں کہا گیا ہے کہ انٹرنیٹ کی سست رفتاری سے آئی ٹی فری لانسرز کے پروجیکٹس منسوخ ہورہے ہیں، فری لانسنگ ویب سائٹ فیور نے پاکستان کے فری لانسرز پر پابندی عاید کردی ہے۔ سست انٹرنیٹ سے ملک کی جی ڈی پی کو نقصان ہو رہا ہے، انٹرنیٹ کی رفتار کا مسئلہ ملکی و غیر ملکی سرمایہ کاری میں کمی کا بھی سبب بنے گا۔ ٹیلی کام آپریٹرز ایسوسی ایشن نے انٹرنیٹ کی رفتار میں کمی پر سنگین معاشی خدشات کا اظہار کرتے ہوئے وزیراعظم شہباز شریف سے فوری مداخلت کی اپیل کرتے ہوئے کہا ہے کہ شہباز شریف انٹرنیٹ میں خلل کی تکنیکی وجوہات کا جائزہ لیتے ہوئے انٹرنیٹ کی رفتار بحال کرائیں۔
