ایف بی آر میرے کام کو مشکل بنا رہا ،اس کی ڈیجیٹیلائزیشن ہورہی ہے،وزیراعظم

اسلام آباد (آن لائن) وزیر اعظم شہباز شریف نے کہا ہے کہ ایف بی آر میرے کام کو مشکل بنا رہا ہے ، اب اس کی ڈیجیٹائزیشن ہورہی ہے‘انہوں نے کہا کہ بوناراست کنیکٹیوٹی جدید تکنیکوں کے ذریعے مالیاتی ٹرانزیکشنز کو فروغ دینے کے لیے ایک بہت بڑا قدم ہے۔تفصیلات کے مطابق بوناراست کنیکٹیوٹی کے نفاذ کی افتتاحی تقریب سے خطاب کرتے ہوئے وزیراعظم کا کہنا تھا کہ میں سب کو خوش آمد کہتا ہوں اور اس منصوبے کے لیے میلنڈا گیٹس فاؤنڈیشن سمیت دیگر کا شکریہ ادا کرتا ہوں،بونا راست منصوبہ پاکستانی شہریوں کو عرب ممالک سے ڈیجیٹل ادائیگی کی سہولت دے گا۔ انہوں نے کہا کہ وزیر خزانہ اور گورنر اسٹیٹ بینک نے بہت اچھا کام کیا ہے، پہلے میں کچھ غلطیاں صحیح کرنا چاہوں گا، کارنداز کے سی ای او نے بتایا کہ اس کے مکمل ہونے کا وقت 5 سال تھا لیکن اسے 5 ماہ میں مکمل کیا گیا ہے، بونا کا مطلب ہے ’بنایا‘ ہے یعنی ’بلڈنگ‘۔ شہباز شریف نے بتایا کہ بونا راست کا نفاذ ہمارے لیے بہت اہم ہے، یہ پاکستان کی ڈیجیٹل پیمنٹ انفرااسٹرکچر کو دنیا بھر تک پھیلا دے گا، آج ہمارا ملک وسیع تر مالیاتی ایکو سسٹم نظام میں ضم کر کے گورننس کی نئی جہت میں داخل ہو رہا ہے، یہ اقدام ہمارے عرب ممالک کے ساتھ تاریخی تعلقات کو مزید مضبوط کردے گا، اس کا مقصد بیرون ملک پاکستانیوں کو سہولیات فراہم کرنا ہے۔ ان کا کہنا تھا کہ بونا راست اس بات کی نشاندہی کرتا ہے کہ پاکستان کس طرح جدید ٹیکنالوجی کو نافذ کرتے ہوئے آگے بڑھ رہا ہے اور یہ ایک ایسے وقت میں ہورہا ہے جب ملک اپنی 77ویں سالگرہ منا رہا ہے۔ شہباز شریف نے بتایا کہ عرب اور پاکستان کے کراس بارڈر ریٹیل ریمیٹینس اور ترسیلات زر کی رقم 20 ارب امریکی ڈالر ہے۔ ان کا کہنا تھا کہ جو میرے کام کو مشکل بنا رہا ہے وہ ایف بی آر ہے اور اب اس کی ڈیجیٹائزیشن ہورہی ہے، میلنڈا فاؤنڈیشن اس کے لیے ہماری مدد کر رہا ہے اور میکنزی ہماری کنسلٹنٹ فرم ہے، میرا دوسرا بڑا چیلنج پاور سیکٹر ہے، ہم ایک ہوم گرون اکنامک پروگرام بھی لارہے ہیں، میں جلد اس کا اعلان کروں گا، ہماری قوم بہت بہادر ہے، یہ انتہائی پر امید قوم ہے، یہ سب ریفارمز اب ہو رہی ہیں، اب بات کا نہیں نفاذ کا وقت ہے۔