سکھر (نمائندہ جسارت) روہڑی کے علاقے شاہی بازار سمیت مختلف علاقوں میں گزشتہ 10 دن سے بجلی کی فراہمی معطل ہے۔ عوامی حلقوں کی شکایات کے مطابق ایک ٹرانسفارمر خراب ہونے کی وجہ سے دوسرے ٹرانسفارمر کی لنکس کو اُتار کر شہر کے بڑے علاقے کو اندھیرے میں ڈبو دیا گیا ہے، متاثرہ علاقوں میں شاہی بازار، محلہ لال گلی، بال مبارک گلی سمیت دیگر شامل ہیں۔ شہریوں کا کہنا ہے کہ پچھلے 10 دن سے لگاتار شکایت کے باوجود کوئی شنوائی نہیں ہوئی، بجلی بند ہونے کی وجہ سے گھروں میں خواتین، بچوں، بزرگوں سمیت بیمار افراد کو سخت پریشانی کا سامنا ہے۔ دوسری جانب بجلی نہ ہونے کے سبب شدید گرمی میں تجارتی سرگرمیاں اور کاروبار بری طرح متاثر ہو رہے ہیں۔
