اسلام آباد:الیکشن کمیشن کی جانب سے سیاسی جماعتوں اور ان کے سربراہوں کی نئی فہرست جاری کی گئی ہے، جس میں چیئرمین پی ٹی آئی کی جگہ تاحال خالی ہے۔
نجی ٹی وی کی رپورٹ کے مطابق ای سی پی میں رجسٹرڈ سیاسی جماعتوں کی فہرست کو اپ ڈیٹ کرکے باقاعدہ اجرا کردیا گیا ہے، جس میں تمام جماعتوں کی تفصیلات مع سربراہ اپ ڈیٹ کی گئی ہیں، تاہم پاکستان تحریک انصاف کے چیئرمین کے نام کی جگہ تاحال خالی ہے۔
جاری کی گئی نئی فہرست کے مطابق ای سی پی میں رجسٹرڈ سیاسی جماعتوں کی تعداد 166 ہے۔
الیکشن کمیشن نے ن لیگ کے انٹرا پارٹی الیکشن تسلیم کرتے ہوئے نواز شریف کو بطور صدر مسلم لیگ ن لکھا ہے۔ اسی طرح جماعت اسلامی کے بھی انٹرا پارٹی انتخابات کو تسلیم کیا گیا ہے اور اس کے امیر (سربراہ) کا نام نعیم الرحمٰن لکھا گیا ہے۔ اسی طرح پی ٹی آئی پارلیمنٹرینز کے خانے میں محمود خان کو بطور چیئرمین لکھا گیا ہے۔
آصف زرداری کا نام پاکستان پیپلز پارٹی پارلیمنٹرین کے صدر کے طور پر ہے۔ بلاول بھٹو زرداری کا نام بطور چئیرمین پاکستان پیپلز پارٹی ہے۔ اسفندیار ولی خان کا نام تاحال بطور صدر عوامی نیشنل پارٹی موجود ہے اور پاک سر زمین پارٹی بھی رجسٹرڈ جماعتوں کی فہرست میں شامل ہے۔
