کراچی: کراچی کے علاقے کارساز روڈ پر گاڑی نے 6 افراد کو کچلا جس کے نتیجے میں 2 افراد جاں بحق اور 4 زخمی ہوگئے۔
ریسکیو ذرائع کا کہنا ہے کہ سفید رنگ کی گاڑی خاتون ڈرائیو کررہی تھی۔ پولیس کا کہنا ہے کہ تیز رفتار گاڑی نے موٹرسائیکل ایک کار اور راہگیروں کو کچلا، گاڑی چلانے والی خاتون کو پولیس نے گرفتار کرلیا ہے۔
پولیس نے بتایاکہ زخمیوں کو اسپتال منتقل کیا گیا جہاں حادثے میں زخمی 20 سالہ لڑکی اور 60 سالہ بزرگ دم توڑگئے۔ پولیس کا کہنا تھاکہ حادثے میں 5 افراد زخمی ہوئے جنہیں جناح اسپتال منتقل کردیا گیا ۔
پولیس کے مطابق حادثے کی ذمہ دار خاتون کو بہادر آباد تھانے منتقل کردیاگیا، خاتون کے میڈیکل ٹیسٹ کے بعد لواحقین کی مدعیت میں مقدمہ درج کیا جائے گا۔ پولیس نے بتایاکہ حادثے کے وقت خاتون کے ساتھ اس کا شوہر بھی موجود تھا۔
