ڈارون(اسپورٹس ڈیسک) پاکستان شاہینز نے ٹاپ اینڈ ٹی ٹوئنٹی سیریز میں اے سی ٹی کومیٹس کو 91 رنز سے شکست دے دی۔ اس میچ کی نمایاں بات محمد عرفان خان کی سنچری اور اسپنرز کی عمدہ کارکردگی تھی جن میں لیگ اسپنر عارف یعقوب 4 وکٹوں کے ساتھ نمایاں رہے۔ یہ اس ٹورنامنٹ میں پاکستان شاہینز کی 6 میچوں میں 5ویںکامیابی ہے۔ اس سے قبل پاکستان شاہینز ، پرتھ اسکارچرز کو17 رنز سے تسمانیہ ٹائیگرز کو 5 وکٹوں سے میلبرن رینیگیڈز کو 4 وکٹوں سے اور بنگلا دیش اے کو3 وکٹوں سے ہراچکی ہے۔ گزشتہ روز کھیلے گئے میچ میں پاکستان شاہینز نے ٹاس جیت کر پہلے بیٹنگ کی اور 6 وکٹوں کے نقصان پر 202 رنز بنائے۔جواب میں اے سی ٹی کومیٹس 16.1 اوورز میں 111 رنز بناکر آؤٹ ہوگئی۔ پاکستان شاہینز کی اننگز میں محمد عرفان خان نے جارحانہ انداز میں بیٹنگ کرتے ہوئے 56 گیندوں پر106 رنز اسکور کیے جس میں 14 چوکے اور 2 چھکے شامل تھے۔ 48 رنز پر 4 وکٹیں گرجانے کے بعد محمد عرفان خان نے حسیب اللہ کے ساتھ5ویں وکٹ کی شراکت میں 140 رنز کا اضافہ کیا۔حسیب اللہ نے 49 رنز اسکور کیے اور آؤٹ نہیں ہوئے جس میں ایک چھکا اور 4 چوکے شامل تھے۔ اے سی ٹی کومیٹس کے بلے باز پاکستانی اسپنرز کا مقابلہ کرنے سے قاصر رہے۔ عارف یعقوب نے17 رنز دے کر4 وکٹیں حاصل کیں۔ عرفات منہاس3 کھلاڑی آؤٹ کرنے میں کامیاب رہے جبکہ مبصرخان نے 2 اور فیصل اکرم نے ایک وکٹ حاصل کی۔ کومیٹس کی طرف سے ٹیلر وان لوئن نے سب سے زیادہ 29 رنز بنائے۔
