ٹوکیو (مانیٹر نگ ڈ یسک) جاپانی وزیر اعظم فومیو کشیدا نے اعلان کیا ہے کہ وہ اشیائے ضروریہ کی قیمتوں میں اضافے، سیاسی تنازعات اور عوام کے عدم اعتماد کے باعث اگلے ماہ اپنے عہدے سے مستعفی ہوجائیں گے۔ عالمی خبر رساں ادارے کے مطابق جاپان کے وزیراعظم فومیو کشیدا نے ایک بیان میں کہا ہے کہ انہوں نے عوام کی خاطر مستعفی ہونے کا فیصلہ کیا ہے تاکہ سیاسی اصلاحات کو آگے بڑھانے کا سلسلہ جاری رہے۔ جاپانی وزیراعظم فومیو کشیدا نے یہ بھی باور کرایا کہ وہ لبرل ڈیموکریٹک پارٹی کے لیڈر کے طور پر دوبارہ انتخاب بھی نہیں لڑیں گے۔ خیال رہے کہ67 سالہ فومیو کشیدا اکتوبر 2021ء سے وزیر اعظم کے عہدے پر فائز ہیں تاہم اب بڑھتی ہوئی مہنگائی قیمتوں اور دیگر اسکینڈلز کی وجہ سے ان کی اور ان کی پارٹی کی مقبولیت میں تیزی سے کمی آئی ہے۔ گزشتہ برس نومبر میں جاپانی وزیرعظم نے اپنی مقبولیت کے گراف کو برقرار رکھنے کے لیے170 کھرب (اس وقت100 ارب ڈالر سے زیادہ) مالیت کے ایک بڑے پیکج کا اعلان کیا تھا تاہم اس کا خاطر خواہ فائدہ نہ ہوسکا۔ جاپانی وزیراعظم کے مستعفی ہونے کے اعلان کے بعد اب ان کی جماعت اگلے ماہ ستمبر میں پارٹی کے نئے صدر کا انتخاب کرے گی۔
