اسلام آباد (مانیٹرنگ ڈیسک) 14 اگست کو پاکستان میں صارفین کو انٹرنیٹ سروسز استعمال کرنے میں دشواری کا سامنا کرنا پڑا‘ اس کی اسپیڈ کم رہی اور خصوصاً ڈیٹا پر انٹرنیٹ سروسز خلل کا شکار رہی۔ دوسری جانب رابطوں کا اہم ذریعہ واٹس ایپ ڈاؤن ہونے کی وجہ سے شہری اور کاروباری افراد مشکلات کا شکاررہے جب کہ شہریوں کاکہنا ہے کہ اس سے نہ صرف ان کے حقوق متاثر ہو رہے ہیں بلکہ ریاست کو بھی مالی نقصانات کا سامنا ہے۔ انٹرنیٹ سروسز متاثر ہونے سے آن لائن سواری سمیت کاروبار کی لین دین میں بھی دشواریوں کا سامنا رہا، صارفین سوشل میڈیا پلیٹ فارمز کی بندش پر بھی سراپا احتجاج رہے اور اسے آزادی اظہار کی راہ میں رکاوٹ قرار دیا۔شہریوں نے حکومت سے مطالبہ ہے کہ سوشل میڈیا پلیٹ فارمز بندکرنے کے بجائے شہری آزادی کو اہمیت دی جائے کیونکہ اس سے نہ صرف رابطوں میں شدید دشواری کا سامنا ہے بلکہ انٹرنیٹ بندش عالمی سطح پرحکومت کی بدنامی کا بھی باعث ہے۔ پاکستان ٹیلی کمیونی کیشن نے انٹرنیٹ سروسز متاثر ہونے کے حوالے سے کوئی مؤقف نہیں دیا۔
