پشاور(اسپورٹس ڈیسک )ڈسٹرکٹ ہاکی ایسوسی ایشن پشاور نے 12 اگست سے لالہ ایوب ہاکی اسٹیڈیم میں کھلاڑیوں کے لیے تربیتی کیمپ کا انعقاد کرنے کا اعلان کیا ہے۔ تمام کھلاڑیوں کو 12 اگست کو شام 5 بجے لالہ ایوب ہاکی اسٹیڈیم میں رپورٹ کرنے کی ہدایت دی گئی ہے۔ ڈسٹرکٹ ہاکی ایسوسی ایشن کے سیکرٹری ہدایت اللہ کے مطابق، اس کیمپ میں مختلف عمر کے کھلاڑی شامل ہوں گے۔ کیمپ میں شریک کھلاڑی ضیاء الرحمن بنوری سے رابطہ کریں،اس ٹریننگ و کوچنگ کیمپ میں کوچنگ کے فرائض یاسر اسلام اور آصف اسلام انجام دیں گے۔ہدایت اللہ کے مطابق یہ کیمپ خیبر پختونخواہ ہاکی ایسوسی ایشن کی ہدایت پر لگایا جا رہا ہے، جس کا مقصد اگلے مہینے ہونے والی سینئر اور جونیئر چمپئن شپ کی تیاری کرنا ہے۔ صوبائی ہاکی ایسوسی ایشن نے تمام اضلاع کے ڈسٹرکٹ ہاکی ایسوسی ایشن کو اپنے ہیڈ کوارٹر گرائونڈز پر کیمپ لگانے کی ہدایت کی ہے تاکہ مختلف عمر کے کھلاڑیوں کو تربیت دی جا سکے اور وہ آئندہ ٹرائلز میں بہتر کارکردگی کا مظاہرہ کر سکیں۔جشن آزادی کے سلسلے میں بھی صوبہ بھر کے تمام اضلاع کی ایسوسی ایشن کو 13 اور 14 اگست کو مقابلے منعقد کرنے کی ہدایت کی گئی ہے۔
