بارش کے باعث کراچی سے روانہ ہونے والی ٹرینیں تاخیر کا شکار

کراچی (اسٹاف رپورٹر)بارش کے باعث کراچی سے روانہ ہونے والی ٹرینیں تاخیر کا شکار ہو گئیں ، کراچی کینٹ اسٹیشن پر شہریوں کا رش لگ گیا ٹرین کے منتظر مسافروں نے بروقت اطلاع نہ دینے کا شکوہ بھی کیا ہے۔ کراچی سے روانہ ہونے والی ٹرینیں تاحال مسافروں کو لے کر روانہ نہیں ہوئیں۔مسافر کا کہنا ہے کہ ایک گھنٹے کا سفر کر کے اسٹیشن پہنچے ہیں، اب گھر واپس جانا ممکن نہیں اگر بروقت اطلاع دی جاتی تو ہم گھر سے ہی نہ نکلتے، ابھی مزید2 گھنٹے انتظار کرنا ہے لیکن یہاں بیٹھنے کی سہولت بھی موجود نہیں،بس تسلیاں دی جا رہی ہیں، حتمی وقت نہیں بتایا جا رہا ہے۔مسافروںنے سہولیات کے فقدان پر ریلوے انتظامیہ پر تنقیدکی بوچھاڑ کردی۔کراچی تا لاہور پاکستان ایکسپریس دوپہر 2 کے بجائے رات 7 بجکر30 منٹ پر روانہ ہوئی، کراچی تا لاہور قراقرم ایکسپریس دوپہر 3 کے بجائے شام 6 بجکر30 منٹ پر روانہہوئی ، کراچی تا ملتان زکریا ایکسپریس 5 :50 کے بجائے 7 بجے روانہ ہوئی جبکہ کراچی تا فیصل آباد ملت ایکسپریس شام 5 کے بجائے رات 9 بجے روانہ ہوئی۔