لاہور (کامرس ڈیسک) لاہور چیمبر آف کامرس اینڈ انڈسٹری کے زیر اہتمام خواتین کی صحت کے لیے سرویکل سکریننگ کی اہمیت پر آگاہی سیشن کا انعقاد کیا گیا- آگاہی سیشن میں لاہور چیمبر کے صدر کاشف انور، پروفیسر ڈاکٹر زونا سعید، ڈاکٹر روحی سعید، پروفیسر ڈاکٹر محمد سعید، لاہور چیمبر کی ایگزیکٹو کمیٹی کی رکن فریحہ یونس، شعبہ صحت سے تعلق رکھنے والے ماہرین، تاجر برادری کے رہنمائو ں اور دیگر شعبہ ہائے زندگی سے تعلق رکھنے والے افراد کی بڑی تعداد نے شرکت کی۔صدر لاہور چیمبر کاشف انور نے سرویکل اسکریننگ کی اہمیت کو اجاگر کرتے ہوئے کہا کہ اس سے سرویکل کینسر کو روکنے میں مدد ملتی ہے جو عالمی سطح پر بڑا مسئلہ بن چکا ہے۔ انہوں نے کہا کہ لاہور چیمبر کا بنیادی مقصد ٹیکس، تجارت، صنعت اور معیشت کے مسائل پر بات کرنا ہے لیکن یہ فلاحی شعبہ میں بھی فعال ہے۔انہوں نے کہا کہ لاہور چیمبر خواتین کی فلاح و بہبود کے لیے بہت سے اقدامات اٹھارہا ہے۔کاشف انور نے کہا کہ لاہور چیمبر نے خواتین کاروباری افراد کے لیے ویمنز بزنس لاو نج قائم کیا ہے جبکہ خواتین کی بہترین خدمات کا اعتراف کرنے کے لیے پہلی مرتبہ ایوارڈز کا انعقاد کیا گیا۔ انہوں نے چھاتی کے کینسر کے بارے میں آگاہی بڑھانے اور خصوصی افراد کے لیے لاہور چیمبر کی کاوشوں پر بھی روشنی ڈالی۔
