وزیراعظم کا پاسکو میں مبینہ گندم اسکینڈل کا نوٹس‘ مجرمانہ کارروائی کا حکم

اسلام آباد (مانیٹرنگ ڈیسک) وزیر اعظم شہباز شریف نے پاسکو میں مبینہ گندم اسکینڈل کا نوٹس لے لیا۔ وزیراعظم نے مبینہ گندم اسکینڈل کا نوٹس لیتے ہوئے سابق ایم ڈی پاسکو کیپٹن (ر) سعید سمیت دیگر افسران کے خلاف مجرمانہ غفلت کی کارروائی اور گندم کا سراغ لگانے کا حکم دے دیا۔ وزیراعظم نے ڈی جی ایف آئی اے کو پاسکو میں کرپشن کی انکوائریز ایک ہفتے میں مکمل کرنے کی ہدایت کر دی۔ دستاویز کے مطابق وزیر اعظم انسپکشن کمیشن کو ابتدائی انکوائری میں گمراہ کن معلومات فراہم کی گئی تھیں، گزشتہ 2 سال میں وزیراعظم انسپکشن کمیشن کے ساتھ بیورو کریسی نے تعاون نہیں کیا۔ اس حوالے سے شہباز شریف کا کہنا ہے کہ 2022کے سیلاب میں گندم کے ذخائر کو نقصان پہنچانے والے رعایت کے مستحق نہیں ہیں، 2022 کے سیلاب میں گندم کی چوری کی انکوائری رپورٹ 2 ہفتوں میں پیش کی جائے۔ وزیراعظم نے ہدایت کی کہ وزارت غذائی تحفظ اور خزانہ پاسکو کے تمام امور آؤٹ سورس کرنے پر جامع رپورٹ پیش کرے۔ یاد رہے کہ 2022 کے سیلاب میں 34 ہزار ٹن گندم پاسکو گوداموں سے غائب ہوئی تھی۔