راولپنڈی : جماعت اسلامی پاکستان کے امیر حافظ نعیم الرحمن حکومت سے مطالبہ کیا کہ انڈیپنڈنٹ پاور پروڈیوسرز (آئی پی پیز) کے ساتھ ہونے والے ‘غیر قانونی’ معاہدے پبلک کیے جائیں۔
چوتھے روز جاری جماعت اسلامی کے دھرنے کے شرکاء سے خطاب کرتے ہوئےانہوں نے کہا کہ حکومت کی ناقص پالیسیوں اور زائد بجلی کے بلوں کی وجہ سے عوام خود کشیاں کرنے پر مجبور ہو گئے ہیں۔
حافظ نعیم الرحمن نے دھرنے کے شرکاء کی تعریف کرتے ہوئے کہا کہ انہوں نے تمام مشکلات کے باوجود شرکت کر کے ایک نئی تاریخ رقم کی ہے۔
انہوں نے دعویٰ کیا کہ جماعت اسلامی کے علاوہ کوئی اور جماعت پاکستان کے 25 کروڑ عوام کی حقیقی نمائندہ نہیں بن سکتی۔
حافظ نعیم الرحمن نے لاہور میں جماعت اسلامی کی خواتین کارکنوں کو روکنے کی حکومتی کوششوں پر سخت تنقید کرتے ہوئے کہا کہ یہ حکومت کی بزدلی کا منہ بولتا ثبوت ہے۔
آئی پی پیز کو صلاحیت کی ادائیگیوں پر تنقید کرتے ہوئے، امیر جماعت اسلامی نے کہا کہ عوام کو ٹیکس اور بجلی کے بل ادا نہیں کرنے چاہئیں۔ انہوں نے کہا کہ “ہم نے بجلی کے بلوں پر کیپسٹی چارجز ختم کرنے کا مطالبہ کیا ہے۔”
انہوں نے حکومت سے تمام آئی پی پیز کا آڈٹ کرنے کا بھی مطالبہ کیا، اور کہا کہ 2600 ارب روپے کے گردشی قرضے نے عوام کی زندگیوں کو بُری طرح متاثر کیا ہے۔
انہوں نے سرکاری ملازمین سے ایندھن اور بجلی کی سہولیات واپس لینے کا مطالبہ کیا، اور افسوس کا اظہار کرتے ہوئے کہا کہ سرکاری ملازمین 1300cc کاریں استعمال کر رہے ہیں جبکہ سابق وزیر اعظم محمد خان جونیجو کے دور میں یہ سہولت 1000cc کاروں تک محدود تھی۔
پیٹرول کی قیمتوں کے بارے میں بات کرتے ہوئے، انہوں نے پیٹرولیم لیوی کو ختم کرنے اور پیٹرولیم مصنوعات کی قیمتوں کو اس کے مطابق ایڈجسٹ کرنے پر زور دیا۔
