کراچی (کامرس رپورٹر) ایس ایم ای فاؤنڈیشن کے صدر ولی اللہ خان نے کہا کہ ملکی معیشت پر مہنگی ترین بجلی کے تباہ کن اثرات پر شدید تشویش کا اظہار کرتے ہوئے کہا کہ 40آئی پی پیز کو نوازکر ملکی خزانے کو کنگال کردینا کہاں کا انصاف ہے،زائد بجلی نرخوں سے چھوٹی صنعتیں بند ہونے کے باعث بیروز گاری بڑھ رہی ہے،بجلی کے زائد بلوں نے عوام اور تاجروں تباہی کے کنارے لا کھڑا کیا ہے۔ولی اللہ خان نے مزید کہا کہ ملک میں 25 فیصد آئی پی پیز بند ہیں،اس کے باوجود بند آئی پی پیز کوماہانہ 10ارب روپے کی ادائیگیاں کی جارہی ہیں اور بزنس کمیونٹی کی جانب سے ادا کیا جانے والا ٹیکس آئی پی پیز مافیا کے حوالے کیا جارہا ہے جس کی وجہ سے ملکی معیشت مشکلات سے دوچار ہے۔انہوں نے کہا کہ آئی پی پیز سے کیے گئے معاہدوں کی منسوخی موجودہ نازک صورتحال میں انتہائی ضروری ہے۔ ولی اللہ خان نے کہا کہ کرائے کے بجلی گھروں کے ساتھ ہونے والے معاہدے جلد بازی میں کیے گئے ہیں اور اس میں ملکی مفاد کو مدنظر نہیں رکھا گیا، کرائے کے بجلی گھروں کے مالکان کو اربوں روپے سے زائد کی رقم ایڈوانس میں دی گئی۔ انہوں نے حکومت پر زور دیا ہے کہ آئی پی پیز سے معاہدوں کا ازسر نو جائزہ لیا جائے اور بجلی کمپنیوں کا انٹرنیشنل کمپنی سے آڈٹ کرایا جائے بصورت دیگر ملک انارکی کا شکار ہوجائے گا۔
