لندن:دنیا کے طاقت ور ترین پاسپورٹس میں پاکستان کو 100واں نمبر مل گیا۔
بین الاقوامی خبر رساں اداروں کے مطابق رواں سال کے دنیا کے طاقت ور ترین پاسپورٹس کی فہرست کا اجرا ہوگیا ہے، جس میں سنگاپور بدستور پہلے نمبر کی پوزیشن پر موجود ہے۔
ہینلے کی جانب سے جاری کی گئی فہرست میں اس سال بھی سنگاپور کے پاس پورٹ کو سب سے طاقت ور قرار دیتے ہوئے بتایا گیا ہے کہ یہ پاسپورٹ رکھنے والے افراد دنیا کے 195 ملکوں تک ویزا کے بغیر پہنچ سکتے ہیں۔
اسی طرح جاپان، اسپین، فرانس، جرمنی، اٹلی، دوسرے نمبر پر آئے ہیں، جن کا پاسپورٹ رکھنے والے لوگ دنیا کے 192 ملکوں میں بغیر ویزا کے سفر کریں گے۔ تیسرے نمبر پر آسٹریا، فن لینڈ، آئرلینڈ، لکسمبرگ، نیدرلینڈز، جنوبی کوریا اور سویڈن مشترکہ طور پر موجود ہیں۔ ان ممالک کے پاسپورٹ پر دنیا کے 191 ممالک میں بغیر ویزا کے جا سکتے ہیں۔
چوتھے نمبر پر برطانیہ، نیوزی لینڈ، ناروے، بلجیم، ڈنمارک اور سوئٹزرلینڈ ہیں۔ آسٹریلیا اور پرتگال پانچویں،یونان اور پولینڈ چھٹے، کینیڈا 3 دیگر ممالک کے ساتھ ساتویں، امریکا دیگر 3 ممالک کے ساتھ 8 ویں نمبر پر ہے۔
فہرست میں سب سے آخر میں 103 واں نمبر افغانستان کا ہے۔ پاکستان 100 ویں نمبر پر یمن کے ساتھ ہے، جس کے بعد عراق، شام اور افغانستان ہیں۔
