اسلام آباد: وفاقی وزیر پٹرولیم ڈاکٹر مصدق ملک نے کہاہے کہ ترکمانستان کے وزیر خارجہ کادورہ دونوں ممالک کے درمیان سفارتی اور اقتصادی تعلقات کو مضبوط بنانے میں ایک اہم سنگ میل ہے۔
مصدق ملک کا کہنا تھا کہ تاپی پائپ لائن پروجیکٹ توانائی کی لاگت کو کم کرے گا، جو صنعتی ترقی کو فروغ دے گا، ملازمتیں پیدا کرے گا اور اقتصادی ترقی میں مدد فراہم کرے گا۔
وفاقی وزیر برائے پیٹرولیم ڈاکٹر مصدق ملک نے ترکمانستان کی کابینہ کے ڈپٹی چیئرمین اور وزیر خارجہ، راشد مریدوف کے ساتھ ملاقات کی۔ ان کے ہمراہ ترکمان وفد میں وزارت خارجہ بین الاقوامی اقتصادی تعاون ڈویڑن کے سربراہ آتا حلجانوف، ترکمانستان کے وزارت خارجہ کے قانونی شعبے کے سربراہ عیزیز نازروف، چیئرمین بورڈ اور سی ای او، ٹی اے پی آئی پائپ لائن کمپنی لمیٹڈمحمدمیرات آمانوف، ترکمانستان کے سفیر برائے پاکستان آتاجان موولاموف؛ اور ترکمانستان کے سفارت خانے کے تیسرے سکریٹری ایلدار پرمانوف شامل تھے۔ایڈیشنل سیکرٹری حسن یوسفزئی، جوائنٹ سیکرٹری شہباز طاہر، اور ایم ڈی انٹر اسٹیٹ گیس سسٹم لمیٹڈ ندیم باجوہ بھی اس موقع پر موجود تھے۔
مصدق ملک نے ترکمان وفد کا خیرمقدم کیا اور ترکمانستان کے حالیہ دورے کے دوران مہمان نوازی کے لیے شکریہ ادا کیا اور کہا کہ ترکمانستان کے وزیر خارجہ کا دورہ دونوں ممالک کے درمیان سفارتی اور اقتصادی تعلقات کو مضبوط بنانے میں ایک اہم سنگ میل ہے۔ انہوں نے کہا کہ تاپی پائپ لائن پروجیکٹ توانائی کی لاگت کو کم کرے گا، جو صنعتی ترقی کو فروغ دے گا، ملازمتیں پیدا کرے گا اور اقتصادی ترقی میں مدد فراہم کرے گا۔ قابل اعتماد اور سستی توانائی کی فراہمی صنعتی شعبوں اور مجموعی اقتصادی استحکام کے لیے بہت ضروری ہے۔
