پاک یونائیٹڈ میڈیا فورم کے مرکزی چیئرمین سارک انٹرنیشنل جرنلسٹ فورم سعودی عرب چیپٹر کے صدر باہمت صحافی عابد شمعون چاند نے شہداء کربلا کو خراج عقیدت پیش کرتے ہوئے کہا کہ دین اسلام کو زندہ رکھنے کے لیے حضرت امام حسین علیہ السلام اور شہداء کربلا کی عظیم قربانی پوری کائنات کیلئے مشعل راہ ہے حضرت امام حسین علیہ السلام نے اہل بیعت کے ساتھ دین حق کے لیے جام شہادت نوش کرکے پوری دنیا کو یہ پیغام دیا ہے کہ کفر کی حکومت تو چل سکتی ہے لیکن ظلم کی نہیں ، حق و باطل کا معرکہ ازل سے ابد تک جاری رہے گا عابد شمعون چاند نے کہا کہ واقعہ کربلا ہمیں ظالم اور باطل سے ٹکرانے کا درس دیتا ہے نواسہ رسول ﷺ حضرت امام حسین علیہ السلام اور ان کے رفقاء کی قربانی سے ہمیں بہت سے اسباق ملتے ہیں جس پر عمل کرکے ہم دنیا و آخرت میں کامیابی حاصل کر سکتے ہیں مولا امام عالی مقام حضرت امام حسین علیہ السلام کی بے مثال قربانی ہمیں یہ درس دیتی ہے کہ اللہ تعالی کی رضا و خوشنودی حاصل کرنے کیلئے راہ حق میں اپنی اپنی جان ، مال ، عزت و آبرو آل اولاد سب کچھ قربان کر دینا ہی مومن کا مقصد حیات ہے عابد شمعون چاند نے مزید کہا کہ حضرت امام حسین علیہ السلام کی شہادت تاریخ اسلام کا وہ روشن باب ہے جو اپنی حیثیت کے لحاظ سے منفرد اور بے مثال ہے محرم الحرام کا مہینہ ہمیں امن بھائی چارے اخوت رواداری تحمل و برداشت اور صبر وایثار کا درس دیتا ہے میدان کربلا میں خدا کی رضا اور دین مبین کے تحفظ کے لیے جو چراغ نواسہ رسول ﷺ نے اپنے خاندان اور جانثاروں کے لہو سے روشن کئے اس کی مثال صبح قیامت تک زمانہ اور اہل زمانہ دینے سے قاصر رہے گا یوم عاشور حق و انصاف کیلئے استقامت کا بہت بڑا سبق ہے جو امت مسلمہ کو حق کی سر بلندی کیلئے بڑی سے بڑی قربانی کا پیغام دیتا ہے معاشرے میں اخوت اور برداشت کے جذبات کو فروغ وقت کی اہم ضرورت ہے حضرت امام حسین علیہ السلام کی تعلیمات اور افکار پر عمل کرکے پر امن معاشرہ تشکیل دیا جا سکتا ہے۔