اسلام آباد: کے الیکٹرک نے اہل کراچی کے لیے بجلی کی قیمت میں مزید اضافے کے لیے نیپرا میں درخواست دے دی۔
نجی ٹی وی کی رپورٹ کے مطابق شہر قائد کے باسیوں کو کے الیکٹرک نے ایک اور بجلی کا جھٹکا دینے کی تیاری کرلی ہے، اس سلسلے میں بجلی کی قیمت میں 5.45 روپے فی یونٹ اضافے کےل یے نیپرا کو درخواست دی گئی ہے۔
کے الیکٹرک کی جانب سے بجلی کی قیمت میں اضافے کی درخواست فیول پرائس ایڈجسٹمنٹ (ایف پی اے) کی مد میں جمع کرائی گئی ہے، جس میں مئی اور جون کے ماہانہ ایف سی اے کے تحت اضافہ مانگا گیا ہے۔
کے الیکٹرک کی جانب سے کہا گیا ہے کہ مئی کے لیے 2 روپے 53 پیسے اور جون میں ایف سی اے کی مد میں 2 روپے 92 پیسے اضافے کی منظوری دی جائے۔
نیپرا کی جانب سے کے -الیکٹرک کی درخواست پر 30 جولائی کو سماعت کی جائے گی اور اتھارٹی سماعت کے بعد بجلی کی قیمت میں مزید اضافے سے متعلق حتمی فیصلہ کرے گی۔
