کوئٹہ(نمائندہ جسارت)بلوچستان کے ضلع زیارت میں سیاحوں کی گاڑی گہری کھائی میں گر نے کے نتیجے میں دو بھائیوں سمیت 6 افراد جاں بحق ہوئے، سیاحوں کا تعلق کوئٹہ سے ہے۔لیویز حکام کے مطابق حادثہ بدھ کو زیارت میں دوزخ تنگئی کے قریب پیش آیا جہاں تیزرفتاری کے باعث گاڑی گہری کھائی میں گر گئی۔ جس کے باعث گاڑی میں سوار پانچ افراد موقع پر جاں بحق اور دو زخمی ہوگئے۔ واقعے کے بعد لاشوں اور زخمیوں کو ڈی ایچ کیو اسپتال زیارت منتقل کردیا۔ دوران علاج ایک زخمی دم توڑ گیا۔ حادثے میں جاں بحق افراد کی تعداد 6 ہوگئی۔ جاں بحق افراد کی شناخت رحیم الدین ولد شیر علی، نجم الدین ولد شیرعلی، عبداللہ، محمد اعظم ولد محمد عیسی، بائیک، عبدالمالک ولد محمد یوسف،جبکہ زخمی ہونے والے فرد کا نام محمدفاروق ولد محمد حنیف شامل ہیں۔ لیویز حکام کا بتانا ہے کہ سیاحوں کا تعلق کوئٹہ کے علاقے پشتون باغ سے ہے۔ ضروری کارروائی کے بعد لاشیں کوئٹہ منتقل کردی گئی ۔ جن کی تد فین مغربی بائی پاس کے قبرستان میں کی گئیں۔
