پشاور(اسپورٹس ڈیسک)خیبر پختونخوا سائیکلنگ ایسوسی ایشن اور ایبٹ آباد ریجنل اسپورٹس آفس کے زیر اہتمام ہر سال کی طرح اس سال بھی چنار فیسٹیول سائیکل ریس کا انعقاد کیا گیا جس میں خیبر پختونخوا کے سائیکلسٹ ثنائاللہ نے ایک گھنٹہ 32 منٹ میں مقررہ فاصلہ طے کرتے ہوئے ٹرافی اپنے نام کرلی‘مہمان خصوصی ریجنل اسپورٹس آفیسر احمد زمان اورچیئرمین کے پی سائیکلنگ ایسوسی ایشن اور آرگنائزنگ سیکرٹری نثار احمد تھے جنہوں نے کھلاڑیوں میں ٹرافیاں اور دیگر انعامات تقسیم کئے‘ریس میں سوات‘ مردان‘ ہزارہ پشاور اسلام آباد، ایس ایس جی سی اور بائیکستان سائیکلنگ اکیڈمی کے 35 سائیکل سواروں نے شرکت کی۔
‘ ایبٹ آباد سے نتھیا گلی 33 کلومیٹر کی ریس میں 6 نقد انعامات ٹرافیاں اور شیلڈز تقسیم کی گئیں‘ خیبر پختونخوا کے سائیکلسٹ ثناء اللہ نے ایک گھنٹہ 32 منٹ میں ریس مکمل کر کے پہلی، اسلام آباد کے نثار علی نے ایک گھنٹہ 33 منٹ وقت کیساتھ دوسری، بائیکستان سائیکلنگ اکیڈمی کے شبیر حسین نے ایک گھنٹہ 35 منٹ کے ساتھ تیسری‘صدیق اللہ نے چوتھی‘ عدنان نے 5ویں اور عمران نے چھٹی پوزیشن حاصل کی‘ججز اور ٹیکنیکل آفیشلز میں ایبٹ آباد کے ناصر محمود، مراد علی، سرمد شباب اور اویس خان نے فرائض سر انجام دیئے۔
