آستانا: وزیراعظم شہباز شریف نے کہا ہے کہ اسرائیل جنگی مجرم ہے، ہم فلسطین میں غیر مشروط اور فوری جنگ بندی کا مطالبہ کرتے ہیں۔
قازقستان کے دارالحکومت میں شنگھائی تعاون کانفرنس (ایس ای او سمٹ) سے خطاب کرتے ہوئے وزیراعظم شہباز شریف نے کہا کہ اسرائیل فلسطین میں جنگی جرائم کا ارتکاب کررہا ہے، جس پر عالمی عدالت انصاف کی جانب سے بھی اسرائیلی جارحیت کا نوٹس لیا گیا ہے۔ انہوں نے کہا کہ پاکستان فلسطین میں غیر مشروط اور فوری جنگ بندی کا مطالبہ کرتا ہے۔
انہوں نے کانفرنس کے انعقاد پر قازقستان کے صدر کو مبارک باد پیش کرتے ہوئے کہا کہ آج ہمارے مابین اہم دستاویزات پر اتفاق ہوا ہے، ہم سب اس میں شامل اہداف کے حصول کے لیے اپنا اپنا ہرممکن کردار ادا کریں گے۔
شہباز شریف کا کہنا تھا کہ دنیا میں بڑھتے ہوئے تنازعات کی وجہ سے انسانیت شدید مسائل اور بحرانوں کا شکار ہے۔ دنیا میں امن اور بقائے باہمی کے لیے تمام تنازعات کا پرامن حل ہونا ناگزیر ہے۔
وزیراعظم کا کہنا تھا کہ یہ کانفرنس ایسے موقع پر ہو رہی ہے جب فلسطین اسرائیل کے ہاتھوں انسانیت سوز جارحیت اور مظالم کا شکار ہے، وہاں ہزاروں فلسطینی بچے شہید ہو چکے ہیں۔ اسرائیل عالمی دباؤ کو نظر انداز کرتے ہوئے کھلے عام جنگی جرائم کا ارتکاب کیے جا رہا ہے۔ہم فلسطین میں فوری طور پر غیر مشروط جنگ بندی کا مطالبہ کرتے ہیں۔
انہوں نے مزید کہا کہ دنیا میں اسلاموفوبیا بھی ایکمسئلہ ہے، ہم سب کو اس کے حل کے لیے بھی مشترکہ اقدامات کرنا ہوں گے۔اسی طرح ماحولیاتی تبدیلی بھی پوری دنیا کےسامنے نئے چیلنجز کی شکل میں سامنے آ رہی ہے جب کہ پہلے ہی کورونا کی وجہ سے پوری دنیا معاشی اور سماجی مسائل سے دوچار ہو چکی ہے۔
