کراچی ( بزنس رپورٹر )رائس ایکسپورٹرز ایسوسی ایشن آف پاکستان (ریپ) کے سابق چیئرمین،ممبر ایگزیکٹو کمیٹی ایف پی سی سی آئی،سابق کنوینر رائس ایکسپورٹ کمیٹی ایف پی سی سی آئی رفیق سلیمان نے اعلان کیاہے کہ مالی سال2023-24 کے دوران پاکستان سے چاول کی برآمدات 3.88 بلین ڈالر کے تاریخی سنگ میل تک پہنچ گئی ہیں اور چاول کی برآمدات میں تیزی پچھلے مالی سال کے مقابلے میں نمایاں اضافہ ظاہر کرتی ہے۔رفیق سلیمان نے بتایا کہ رواں مالی سال میں پاکستان نے 5.979 ملین میٹرک ٹن چاول برآمد کیا جس کی مالیت تقریباً 3.88 بلین ڈالر ہے۔ یہ مقدار میں 60 فیصد اضافہ اور قیمت میں پچھلے سال کے مقابلے میں 80 فیصد اضافے کی نشاندہی کرتا ہے، اس دوران 3.717 ملین میٹرک ٹن چاول برآمد کیے گئے، جن کی مالیت 2.15 بلین ڈالر ہے۔رفیق سلیمان نے انتہائی خوشی کا اظہار کرتے ہوئے بتایا کہ چاول کی برآمدات کئی سالوں سے جمود کا شکار تھیں لیکن ریپ کی موجودہ قیادت کے دورمیں یہ تاریخی ہدف حاصل کر لیا گیا ہے۔ انہوں نے حالیہ پانی کے بحران سمیت دیگر چیلنجزکو تسلیم کیا جو اگلے سال کے لیے ہیں۔رفیق سلیمان نے روشنی ڈالی کہ تھائی لینڈ، ویتنام اور چین جیسے ممالک پانی کے موثر انتظام کی وجہ سے سالانہ 2-3 چاول کی فصلیں پیدا کرتے ہیں، جس کے نتیجے میں پیداوار زیادہ ہوتی ہے، پاکستان، چاول کی کل پیداوار 9 ملین ٹن تک پہنچنے کے ساتھ، پانی کے بہتر ذخیرہ اور آبپاشی کے بنیادی ڈھانچے کے ساتھ بھی زیادہ پیداوار حاصل کر سکتا ہے۔ ڈیموں کی تعمیر لاکھوں ایکڑ فٹ اراضی کو سیراب کرنے کے قابل بنائے گی۔
