اسلام آباد(نمائندہ جسارت) پاکستان ریلوے نے گرمیوں کی تعطیلات کے دوران عوام کی سہولت کے لیے کراچی سے راولپنڈی تک ایک نئی ٹرین ’’ سمر ویکیشن اسپیشل ٹرین‘‘ کے آغاز کا اعلان کیا ہے۔اطلاعات کے مطابق سمر ویکیشین اسپیشل ٹرین کراچی سے رات8:45پر روانہ ہوگی، اور دوپہر 3:40پر لاہور پہنچے گی، پھر رات 10:00 بجے راولپنڈی پہنچے گی۔واپسی کا سفر راولپنڈی سے دوپہر12:30 پر شروع ہو گا، ٹرین شام 6 بجے لاہور اور اگلے دن دوپہر2:15 پر کراچی پہنچے گی۔ سمر ویکیشن اسپیشل ٹرین 17 بوگیوں پر مشتمل ہوگی جن میں 2 اے سی بزنس، 2 اے سی اسٹینڈرڈ، 12 اکانومی کلاس اور 1 پاور وین شامل ہیں۔پہلی ٹرین راولپنڈی سے 5 جولائی کو دوپہر12:30 بجے کراچی کے لیے روانہ ہوگی، یہ ٹرین ہر 2 دن بعد چلے گی اور کراچی سے راولپنڈی 14 اسٹاپ کرے گی۔ ٹرین 1140 مسافروں کے بیٹھنے کی گنجائش ہوگی۔
