گیس کی قیمتوں میں یکم جولائی سے کمی نہ کرنےکا فیصلہ

270

اسلام آباد: حکومت نے گیس کی قیمتوں میں آئندہ ماہ (یکم جولائی سے) کمی نہ  کرنے کا فیصلہ کیا ہے۔

نجی ٹی وی کی رپورٹ کے مطابق اوگرا نے گیس کی قیمتوں میں 10 فی صد کمی کے فیصلے کے ہوتے ہوئے بھی یکم جولائی  سے گیس کے نرخ کم نہ کرنے کا فیصلہ کیا ہے۔

رپورٹ میں بتایا گیا ہے کہ حکومت نے اس کے بجائے آئی ایم ایف کی ہدایت کے مطابق کیپٹیو پاور پلانٹس (سی پی پیز) کے لیے گیس کی قیمت فی ایم ایم بی ٹی یو 250 روپے تک بڑھاکر فی ایم ایم بی ٹی یو کی موجودہ قیمت 2750 روپے سے بڑھا کر 3000 روپے فی ایم ایم بی ٹی یو کرنے کا فیصلہ کیا ہے۔

حکومت یکم جولائی 2024 سے کیپٹیو پاور پلانٹس کی گیس کی قیمتوں میں 250 روپے فی ایم ایم بی ٹی یو اضافہ کرے گی اور 700 روپے فی ایم ایم بی ٹی یو کا بقیہ اضافہ یکم جنوری 2025 سے لاگو کیا جائے گا۔

رپورٹ میں وزارت توانائی کے حکام کے حوالے سے بتایا گیا کہ حکومت نے سی پی پیز کے علاوہ دیگر تمام کیٹیگریز کے لیے گیس کی قیمتیں موجودہ سطح پر برقرار رکھنے کا فیصلہ کیا ہے اور اس طرح حکومت کو اگلے مالی سال کے لیے مطلوبہ محصولات کی ضروریات کو پورا کرنے کے بعد 110-115 ارب روپے اضافی محصول کے طور پر متوقع ہے۔