لاڑکانہ (نمائندہ جسارت) لاڑکانہ پولیس نے کچے کے علاقے سے ڈیڑھ ماہ قبل اغوا ہونے والے دو مغویوں بھائیوں کو مبینہ مقابلے میں بازیاب کرکے ایک ڈاکو کو اسلحہ سمیت گرفتار کرنے کا دعویٰ کیا ہے۔ اس حوالے سے ایس ایس پی لاڑکانہ میر روحل خان کھوسو نے بتایا کہ 9 مئی کو تھانہ آریجہ کے علاقے گاؤں کوٹھی کلہوڑو سے 2 سگے بھائیوں 24 سال موٹن اور خالق ولد عاشق کلہوڑو کے اغوا کی بروقت اطلاع پولیس کو دی گئی جس پر پولیس نے اغوا کی ایف آئی آر درج کرنے کے بعد متعلقہ ڈی ایس پی صدر، ڈی ایس پی رتوڈیرو، ڈی ایس پی ڈکری، ایس ایچ او مارکیٹ اور سی آئی اے انچارج نے جدید ترین ٹیکنیکل ٹیم ڈی آئی سی سمیت 5 رُکنی خصوصی تحقیقاتی ٹیم تشکیل دی تھی، پولیس نے مہارت، پیشہ ورانہ مہارت اور جدید ٹیکنالوجی کے نظام کو بروئے کار لاتے ہوئے 2 مغویوں کو ایک جگہ سے دوسری جگہ منتقل کرنے کی خفیہ اطلاع پر کچے کے علاقے میں جرائم پیشہ افراد سے مقابلے کے دوران دونوں مغویوں کو بحفاظت بازیاب کرالیا جبکہ پولیس نے ایک ڈاکو کو بھی گرفتار کرلیا ہے جس کی شناخت طالب جتوئی کے نام سے ہوئی ہے جس سے مزید تفتیش جاری ہے۔
