راولپنڈی: وزیراعلی خیبر پختونخوا علی امین گنڈاپور نے انکشاف کیا ہے کہ جنرل قمر باجوہ نے خود کہا تھا کہ جنرل فیض حمید بہترین آرمی چیف ہوں گے۔
بانی چیئرمین سے اڈیالہ جیل میں ملاقات کے بعد میڈیا سے گفتگو میں علی امین گنڈاپور نے کہا کہ عمران خان نے کبھی کسی کو آرمی چیف بنانے کا نہیں کہا تھا۔
علی امین گنڈا پورنے کہا کہ کہ سابق آرمی چیف جنرل قمر باجوہ خود بانی پی ٹی آئی کو کہتے تھے کہ جنرل فیض بہترین آرمی چیف ہوں گے۔
وزیراعلی خیبر پختونخوا کا کہنا تھا کہ بانی کا کسی کو آرمی چیف بنانے کا ارادہ نہ تھا، دہشت گردی میں اضافہ جنرل فیض حمید کو ہٹانے کے بعد ہوا۔
ان کا کہنا تھا کہ بدقسمتی سے جنرل فیض کو ایسے وقت ہٹایا گیا جب وہ افغانستان سے امن و امان میں اہم کردار ادا کر رہے تھے۔ جنرل فیض کو ہٹانے کی وجہ حکومت گرانے کا پلان تھا، نواز شریف یا امریکا سے مل کر بانی پی ٹی آئی کی حکومت ہٹانے کا منصوبہ تھا۔ جنرل فیض کو ہٹانے کے بعد یہ دہشت گردی کو چھوڑ کر تحریک انصاف کے پیچھے لگ گئے۔
