تہران (انٹرنیشنل ڈیسک) ایران کے شمال مشرقی علاقے میں زلزلے سے 4 افراد ہلاک اور 120 زخمی ہوگئے۔ خبررساں اداروں کے مطابق زلزلے کی گہرائی 10 کلومیٹر اور ریکٹر اسکیل پر شدت 4.9 ریکارڈ کی گئی۔ کاشمر کے گورنر حاجت اللہ کے مطابق زلزلے سے شہری اور دیہی علاقوں میں پرانی عمارتوں کو نقصان پہنچا۔ متاثرہ علاقے میں امدادی کارروائیاں جاری ہیں اور زخمی افراد مختلف اسپتالوں میں زیرعلاج ہیں۔ حکام نے زلزلے سے ہلاکتوں میں اضافے کا خدشہ ظاہر کیا ہے۔ یاد رہے کہ ایران کے شمال مغربی علاقے میں گزشتہ سال 5.9 شدت زلزلے سے 5 افراد ہلاک اور 800 زخمی ہوئے تھے ۔
