سانگھڑ (نمائندہ جسارت) گزشتہ روز نواحی علاقے ورکشاپ کی حدود میں وڈیرے نے اپنی زمین پر گھاس چرنے والے اونٹ کی ٹانگ کٹوا دی تھی جس کا مالک اونٹ کی کٹی ٹانگ لے کر میڈیا کے سامنے آگیا، لوگوں نے اسے دل دھلا دینے والا واقعہ قرار دیا۔ اونٹ کی اذیت دیکھ کر ہر آنکھ اشکبار ہو گئی جس کا فوری نوٹس ایم این اے شازیہ عطا مری نے لیا اور مختلف سوشل میڈیا پر ہائی لائٹ ہونے کے بعد پولیس نے سرکار کی مدعیت میں مقدمہ درج کر لیا، نیشنل اور انٹرنیشنل میڈیا نے ظالم وڈیرے کے جبر کو غیر انسانی عمل قرار دیا۔ ایس ایس پی نے ہنگامی پریس کانفرنس کرتے ہوئے بتایا کہ واقعے میں ملوث 5 افراد کو حراست میں لے لیا گیا ہے جنہوں نے اقبال جرم بھی کیا ہے کہ اونٹ ہماری زمین میں نقصان کر رہا تھا، مزید تفتیش جاری ہے، ملزمان کو کیفرکردار تک پہنچایا جائے گا۔ ڈپٹی کمشنر عمران الحسن خواجہ کا کہنا تھا کہ اونٹ کو طبی امداد فراہم کر دی گئی ہے اور مزید میڈیکل ٹریٹمنٹ کے لیے اونٹ کو کراچی شفٹ کیا جا رہا ہے۔
