کراچی:چیئرمین نیو کراچی ٹاﺅن محمد یوسف کے تعاون اور چیئرمین یو سی3 علی ارشد کی ہدایت پر یوسی3 کے وارڈ 3 اور 4 کی کئی سالوں سے بوسیدہ سیوریج کی تباہ شدہ لائنز تبدیل کردی گئی۔
چیئرمین یو سی 3 نے کہا کہ عوام کو درپیش بنیادی مسائل کے حل کےلئے بھرپور اقدامات کر رہے ہیں ، نیو کراچی ٹاؤن میں لا تعداد بلدیاتی مسائل کا سامنا ہے جس کی وجہ سے مخدوش سڑکیں،سیوریج لائنز،کچرے کے ڈھیر ،ابلتے گٹر عوام کے لئے پریشانی کا باعث بن رہے تھے۔
علی ارشد نے کہا کہ انٹر نیشنل شہر کراچی کو اسٹیٹ آف دی آرٹ بنانے کے لئے جماعت اسلامی کے ٹاﺅن چیئرمین اور یوسی چیئرمین اپنی بہترین خدمات پیش کر رہے ہیں، کراچی کے مسائل کو کبھی بھی حل کرنے کے لئے سنجیدہ اقدامات نہیں کئے گئے جس کی وجہ سے آج کراچی انٹرنیشنل شہر ہونے کے باوجود بھی کھنڈرات کا منظر پیش کر رہا ہے۔
انہوں نے مزید کہا کہ چیئرمین نیو کراچی ٹاﺅن کے تعاون سے بلدیاتی مسائل سے عوام کو نجات دلوا رہے ہیں کیونکہ عوام کے مسائل کا حل صرف عوامی نمائندوں کے پاس ہے اس لئے جماعت اسلامی کے عوامی نمائندے عوام کی مشکلات کو اپنی مشکلات سمجھ کر حل کر رہے ہیں۔
