راولپنڈی: آرمی چیف جنرل سید عاصم منیر نے قومی ہاکی ٹیم سے ملاقات کی ہے، جس میں انہوں نے ٹیم کی کارکردگی کی تعریف کی۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر نے قومی ٹیم کے اعزاز میں استقبالیہ دیا اور اذلان شاہ ہاکی کپ میں بہترین اور مثالی کارکردگی کا مظاہرہ کرنے پر قومی کھلاڑیوں کی تعریف کی۔
قومی ہاکی ٹیم نے آرمی چیف جنرل سید عاصم منیر کی دعوت پر جی ایچ کی کا دورہ کیا۔ اس موقع پر پاکستان ہاکی فیڈریشن (پی ایچ ایف) کے صدر طارق حسین اور پی ایچ ایف کے دیگر عہدیداران بھی موجود تھے۔
ترجمان پاک فوج کے اعلامیے کے مطابق آرمی چیف نے کھلاڑیوں کے ساتھ بات چیت کی اور اذلان شاہ ہاکی ٹورنامنٹ میں شاندار کارکردگی دکھانے پر اُن کی تعریف کی اور کہا کہ ہاکی ٹیم نے اچھا کھیل پیش کر کے قوم کو فخر کا موقع فراہم کیا ہے۔ ہم ان کی مسلسل کامیابی کو یقینی بنانے کے لیے جامع تعاون فراہم کرنے کے لیے پرعزم ہیں۔
آرمی چیف نے کھلاڑیوں کے مستقبل کے لیے نیک خواہشات کا اظہار کیا۔ پاکستان ہاکی فیڈریشن کے صدر نے ٹیم سے ملاقات اور بات چیت کے موقع پر آرمی چیف کا شکریہ ادا کیا۔
