کراچی : نالے میں گیس بھرنے سے ہونے والے زوردار دھماکے کی زدمیں آکر 5 افراد زخمی ہو گئے جب کہ کئی گاڑیوں کو بھی نقصان پہنچا۔
پولیس کے مطابق گلشن اقبال کے میں پریکٹیکل سینٹر کے قریب نالے میں گیس بھری تھی، جس سے زور دار دھماکا ہوگیا، دھماکے کی آواز دور دور تک سنائی دی جب کہ نالے پر تعمیر کی گئی چھت اکھڑ کر دور جا گری۔
دھماکے میں 5 افراد زخمی ہوئے جب کہ کئی گاڑیوں اور موٹر سائیکلوں کو نقصان پہنچا۔ ابتدائی اطلاعات کے مطابق دھماکا اس وقت ہوا جب قریب شادی ہال کے باہر آتش بازی کی جا رہی تھی۔
دھماکے کے وقت علاقے میں خوف و ہراس پھیل گیا، اطلاع ملتے ہی پولیس کی نفری اور ریسکیو اداروں کی ٹیمیں جائے وقوع پر پہنچیں جب کہ ایمبولینس کے ذریعے زخمیوں کو اسپتال منتقل کیا گیا۔
