اسلام آباد: ڈپٹی کمشنر اسلام آباد اور دیگر کی توہین عدالت کیس میں سزا کا فیصلہ معطل کردیا گیا۔
خبر رساں ایجنسی کے مطابق اسلام آباد ہائی کورٹ میں ڈپٹی کمشنر اسلام آباد اور دیگر کی سنگل بینچ کی جانب سے دیے گئے توہینِ عدالت سے متعلق کیس کے فیصلے کے خلاف اپیل پر سماعت ہوئی۔
دوران سماعت وکیل کی جانب سے عدالت کوبتایا گیا کہ ڈپٹی کمشنر راولپنڈی نے بانی چیئرمین تحریک انصاف عمران خان کی گرفتاری کے بعد شہریار آفریدی کے لیے ایم پی او کے تحت آرڈر جاری کیا تھا۔
اسلام آباد ہائی کورٹ کے جسٹس میاں گل حسن اورنگزیب نے ریمارکس دیے کہ جب اسلام آباد ہائی کورٹ آرڈر کرتی ہے کہ گرفتار نہیں کرنا تو پھر بھی گرفتار کرلیا جاتا ہے، ہمارے آرڈر کو نظر انداز کردیا جاتا ہے، جب توہینِ عدالت کی کارروائی ہوتی ہے تو معافیاں مانگتے ہیں۔
بعد ازاں عدالت عالیہ نے ڈپٹی کمشنر اسلام آباد اور دیگر کی سزاؤں کو عارضی معطل کرتے ہوئے کیس کی سماعت ملتوی کردی۔ عدالت نے حکم دیا کہ آئندہ سماعت تک سزائیں معطل رہیں گی۔
